Туриннинг «Ювентус» клуби ҳужумчиси Пауло Дибала ёзда «Интер» билан шартнома имзолаш борасида музокараларни давом эттирмоқда. Эслатиб ўтамиз, аргентиналик футболчининг «кекса синьора» билан амалдаги шартномаси мавсум охирида якунига етади ва шу сабаб у «нерадзуррилар» сафига текинга қўшилади.
La Gazzetta dello Sport нашри хабарига кўра, Дибала ўтишни имкон қадар тезроқ якунламоқчи. Шунингдек, «Интер» молиявий муаммолар туфайли яқинда клуб билан янги шартнома имзолаган ҳужумчи Лаутаро Мартинес миланликлар сафини тарк этиши мумкинлиги айтилмоқда.
Дибаланинг хизматларига бошқа клублар ҳам қизиқиш билдирмоқда, улар орасида «Тоттенхэм» ва «Барселона» ҳам бор, аммо футболчининг ўзи А серияда қолишни истайди.
