"Севилья" ҳужумчиси Эрик Ламела "Реал"га қарши Ла Лига доирасидаги навбатдаги ўйин олдидан ҳужумчи Гарет Бэйлнинг атрофидаги вазиятга ўз муносабатини билдирди.

"Мен Гарет Бэйлни яхши биламан. У камтар, жуда одобли йигит. Мен у билан яхши муносабатдаман”, - дейди аргентиналик футболчи.

Журналистларнинг таъкидлашича, Ламеланинг уэльслик ҳужумчига бўлган муносабати жамоатчиликнинг муносабатидан фарқ қилади.

“Ҳамма уни қандай ўйинчи эканлигини билади. Гарет гол уришга келганда жуда совуққон бўлиши мумкин. Шахс сифатида у жуда яхши йигит”, — дея қўшимча қилди Ламела.

17-апрел, якшанба куни “Севилья” Ла Лиганинг навбатдаги турида “Реал”га қарши ўйнайди.