Чемпионшимнинг 43-туридан ўрин олган ўйинда «Дерби Каунти» сафарда «Куинз Парк Рейнжерс»га 0:1 ҳисобида имкониятни бой берди.

Шу тариқа Уэйн Руни шогирдлари Англиянинг иккинчи дивизионида қолиш имкониятидан маҳрум бўлишди. Чемпионат якунланишига 3 та ўйин қолганида 31 очко жамғарган Руни шогирдлари турнир жадвалида сўнгги поғонани эгаллаб турган жамоадан олдинги - 23-ўринни эгаллаб турибди.

«Дерби Каунти» - «Манчестер Юнайтед» ва Англия терма жамоаси собиқ ҳужумчисининг мураббийлик фаолиятидаги биринчи клуб саналади. Клуб бош мураббийи сифатида Руни 82 учрашув ўтказиб, 23 ғалаба, 22 дуранг ва 37 мағлубият қайд этган.

Дербишир графлигидаги клуб 1986 йилдан бери илк бор Англия учинчи дивизионида ўйнайди.

«Дерби Каунти» молиявий муаммолар туфайли мавсум давомида 21 очко олиб ташланди.