Боягина Германия Бундеслигасининг сўнгги, 34-туридан ўрин олган "Кёльн"-"Бавария" ўртасидаги учрашув ниҳоясига етди. Аниқроғи, ниҳоясига етмай қолди...
Чунки ҳакам томонидан қўшиб берилган вақт тугамасдан, мезбон фанатлар майдонда турли моддаларни портлатиб, тутунга тўлдириб юборишди. Ҳакам ҳам ўйинни ўзи белгилаганидан эртароқ тугатишга мажбур бўлди.
Гап шундаки, "Кёльн" 30 очко билан 16-поғонани банд этиб турган эди. Берлиннинг "Ҳерта" клубида эса 28 очко бор. "Ҳерта" ўз майдонидаги учрашувда "Ҳоффенҳайм" устидан 3:1 ҳисобида ғалаба қозонаётган эди (кейинроқ ўйин шу ҳисобда тугади ҳам).
"Кёльн" ўтиш плей-офф ўйинларида қатнашиши имкониятини қўлга киритиш учун эгаллаб турган 16-ўринни сақлаб қолиш тақозо этиларди. Мезбонларни дуранг ҳам қониқтирмасди, сабаби тўплар нисбати бўйича "Ҳерта" устунликка эга.
Ғалаба учун вабанкка борган мезбонлар йирик ҳисобда мағлубиятга учрашди ва Бундеслигани тўғридан-тўғри тарк этишди. Бунга чидай олмаган мухлислар юқоридаги тартибсизликни уюштиришди.
