Бугун Мадриднинг «Реал» клуби сафарда «Осасуна»ни ишончли ҳисобда мағлуб этди — 3:1. Мадриликлар ҳужумчиси Карим Бензема ушбу баҳсда иккита пенальтидан фойдалана олмади.

Шу тариқа франциялик футболчи 2006 йилдан бери Испания Ла Лигасининг бир ўйинида иккита пенальтини аниқ амалга ошира олмаган илк футболчига айланди. Бундай «ютуқ»нинг аввалги муаллифи 2006 йилнинг апрелида «Бетис» дарвозасига икки марта 11 метрлик жаримадан гол ура олмаган Рауль Тамудога («Эспаньол») тегишли.

Эътиборлиси, Бенземанинг иккита ноаниқ зарбаси бор-йўғи етти дақиқа ичида юз берди.

Амалга оширилмаган пенальтиларга қарамай, «Реал Мадрид» «Осасуна» устидан ғалаба қозониб (3:1), чемпионлик томон дадил қадам ташлади.