2021 йилги мавсумда “Арал самали”ни Қорақалпоғистон Вазирлар Кенгаши молиялаштирди ҳамда жамоа Про лига иштирокчисига айланди. 2022 йилга келиб эса Вазирлар Кенгаши Қорақалпоғистон футбол ассоциацияси қошида янги “Арал” жамоасига асос солди.
Ўзбекистон Профессионал футбол лигаси “Арал самали”даги мавжуд қарздорликни бартараф этиш шартида “Арал” футбол жамоасининг Биринчи лигадаги иштирокини таъминлади. Вазирлар Кенгаши томонидан мазкур талаб бажарилди.
Бироқ “Арал самали” молиявий томонлама аросатда қолди. Ўзбекистонда трансфер ойнаси ёпилишига саноқли кунлар қолган бир вақтда жамоани молиялаштириш истагида бўлган тадбиркор топилди ҳамда унда таъсисчилар ўзгарди.
Айни вақтда “Арал самали” Про лигадаги иштирокини давом эттириб келмоқда. Регламентга кўра, клубнинг У-19 жамоаси ҳам чемпионатда иштирок этиши лозим. Аммо молиявий имконият чегараланганидан келиб чиқиб, “Арал самали У-19” дастлабки икки турда иштирок эта олмади.
ЎзПФЛ шу йилнинг 4 апрель куни вазият юзасидан Вазирлар Кенгашига хат йўллаб, ҳудудий академия тарбияланувчиларининг У-19 чемпионатида иштирок этиши масаласида таклиф берди. Вазирлар Кенгаши оғзаки келишув бўйича бунга розилик билдирган бўлса-да, кейинроқ хат билан таклифга рад жавобини берди.
Регламентга кўра, У-19 чемпионатида ўз жамоаси билан иштирок этмаган клуб келаси мавсумни битта қуйи лигада ўтказиши шарт. ЎзПФЛ “Арал самали” эндигина хусусий тадбиркорлар томонидан молиялаштираётганидан келиб чиқиб, жамоага сўнгги имкониятни тақдим этди. Шунингдек, молиявий тарафдан кўмак бўлиши учун “Арал самали” иштирокидаги сафар ўйинлари тақвимида истисно тариқасида энгиллик берилиши қайд этилди. Боиси, “Арал самали” инвесторлари жамоани анча кеч қабул қилиб олган ва уларда пухта смета тайёрлаш учун фурсат этарли бўлмаганди.
Шу тариқа “Арал самали” У-19 чемпионатининг дастлабки уч турида иштирок эта олмади. Айни вақтда жамоа раҳбарияти У-19 жамоаси футболчиларини ЎзПФЛ рўйхатидан ўтказишга ҳаракат қиляпти. Ҳолат юзасидан кейинроқ яна маълумот тақдим этилади. Агар вазият 4-турга қадар ўзгармаса, “Арал самали” келаси мавсумни Биринчи лигада ўтказади.
