"Тоттенхэм" бош мураббийи Антонио Конте клубдаги келажаги ҳақида фикр билдирди.
“Менга бу ерда ишлаш жуда ёқади, мен бу ерда ишлаётган барча одамлар билан, раҳбаримиз Даниэль Леви ҳамда Фабио Паратичи билан ажойиб муносабатдаман. Шу сабабли мавсум охирида яхши учрашув ўтказиш ва ҳамма учун энг тўғри ечим топишга ҳаракат қилиш керак", - деди Конте "Лестер"га қарши ўйин олдидан матбуот анжуманида.
Бироқ, у энг юқори ўринлар учун курашишни афзал кўришини қўшимча қилди.
"Мен курашишга, совринларни қўлга киритишга ҳаракат қилишга ва олтинчи ёки еттинчи, саккизинчи ўринлар учун эмас, балки соврин учун курашишга лойиқман", деди Конте.
Олдинроқ италиялик мутахассис «ПСЖ» раҳбарлари билан ёзда Париж клубига ўтиши мумкинлиги ҳақида музокаралар олиб бораётгани ҳақида хабар берилганди, бироқ, Контенинг ўзи бу маълумотни инкор этган эди.
Айни дамда "Тоттенхэм" АПЛ турнир жадвалида тўртинчи ўринни эгаллаб турибди ва "Арсенал" билан Чемпионлар лигасига бериладиган йўлланма учун курашмоқда.
