Беларусь Олий Лигасининг 6-турида «Энергетик-БГУ» 2 май, душанба куни «Неман» майдонига сафар қилди.

Учрашув Минск клубининг 4:1 ҳисобидаги ғалабаси билан якунланди. Эътиборлиси, меҳмонларнинг 4 та голига ҳам ўзбекистонлик футболчилар муаллифлик қилди. Бобур Абдухолиқов 7, 27 ва 87-дақиқаларда ўз номини таблога ёздириб қўйиб, хет-трик муаллифига айланган бўлса, Абдуқодир Ҳусанов 85-дақиқада жарима зарбасидан ажойиб гол уришга муваффақ бўлди.

Қайд этиш керак, «Энергетик-БГУ» сафида Абдухолиқов ва Ҳусановдан ташқари Шоҳрухбек Абдураҳмонов ҳам ҳаракат қилади. Ҳар учала ўзбекистонлик футболчи мазкур учрашувда асосий таркибда майдонга тушиб, тўлиқ 90 дақиқа ҳаракат қилди.

Ушбу ғалабадан кейин «Энергетик-БГУ»нинг очколари сони 13 тага етди, жамоа мусобақа жадвалида 2-ўринда бормоқда. Ҳисобида 8 та гол ва 1 та голли узатма бўлган Бобур Абдухолиқов эса чемпионатнинг энг самарали ўйинчиси бўлиб турибди.

Беларусь Олий лигаси, 6-тур баҳси
2 май, душанба
«Неман» – «Энергетик-БГУ» 1:4
Голлар: 0:1 – 7 Абдухолиқов, 0:2 – 27 Абдухолиқов, 1:2 – 42 Павлюковес, 1:3 – 85 Ҳусанов, 1:4 – 87 Абдухолиқов.
«Неман»: Василев, Анюкевич, Малиевский, Жимо (Мазурич, 82), Якимов (Грибовский, 72), Жуковский (Зубович, 46), Легчилин, Кадимян (Шукуров, 46), Савиский, Павлюковес, Куадио (Пасевич, 68).
«Энергетик-БГУ»: Макушинский, Свирепа (Самотой, 70), Макавчик, Лаврик, Пашевич, Силинский (Хлебосолов, 70), Абдураҳмонов, Рилач (Малиский, 90), Ҳусанов, Абдухолиқов (Кунский, 89), Папарига (Гришенко, 63).