Бугун Ғузор шаҳридаги "Футбол маркази" майдонида "Шўртан" ҳамда "Насаф" жамоалари ёшлари ўзаро баҳс олиб бордилар.
Учрашув дерби мақомига эга бўлганлиги сабабли, қизиқарли ва кескин курашларга бой бўлди. Ҳар икки жамоа аъзолари ҳужумкор футбол намойиш этишга ҳаракат қилишди.
Ўйиннинг дастлабки бўлимида ўнг қанотдан ошириб берилган тўпни Патрик Агбо боши билан "Насаф" дарвозасини ишғол этган бўлса, иккинчи таймда Шаҳзод Хурсановга нисбатан ишлатилган қўполликдан сўнг меҳмонлар дарвозаси томон пенальти белгиланди.
11 метрли жарима тўпини эса Обид Жўрабоев ўзининг кучли ва аниқ зарба билан "Насаф" дарвозаси нишонга олди ҳамда ҳисобни 2:0га етказди.
Учрашув якунига етиб бораётган паллада "Шўртан" ҳимоячилари бироз хотиржамликка берилиб кетишди ва бундан "Насаф" футболчилари унумли фойдаланиб, Ҳусан Орзиқулов дарвозасини ишғол этишди. Аммо, бу киритилган гол меҳмонларни мағлубиятдан қутилиб қолишлари учун камлик қилди...
Ёшлар лигаси. 10.05.2012 йил. 8-тур. Ғузор шаҳри.
"Шўртан"-"Насаф" 2:1 (1:0)
Ҳакам: А. Гормашов.
Голлар: П. Агбо, О. Жўрабоев - А. Маликов.
