Сурхондарё вилояти Қумқўрғон туманининг «Қумқўрғон» жамоаси жорий мавсумда ўз тарихида илк марта Биринчи лига мусобақасида иштирок этмоқда. Жамоа стадиони мавсум аввалида шаъй ҳолат бўлмагани учун клуб дастлабки 3та ўйинни сафарда ўтказишига тўғри келди. 4-турдан ўрин олган ўйин эса қумқўрғонлик мухлислар учун ҳақиқий байрамга айланди.

Тошкент шаҳрининг "Дўстлик" клубига қарши ўйинни томоша қилиш учун, Рамазон ойи бўлишига қарамай, стадионга 4-5 минг атрофида ишқибоз ташриф буюрди. Учрашув комиссари Онгар Жалимов эса қайдномага 3200 нафар мухлисни қайд этган. Аммо гувоҳларнинг айтишича, стадионга келган томошабинлар сони бундан анча кўп бўлган.

«Қумқўрғон» клуб мутасаддилари мухлисларнинг стадионга келишлари учун кўп ишларни амалга оширишди. Улар чекка-чекка қишлоқларгача бориб, ташвиқот ишларини олиб боришди, аҳоли гавжум жойларга реклама баннерларини илишди. Бу эса ўз самарасини бера бошлади. Клуб раҳбарияти жамоанинг навбатдаги уй учрашувларида мухлислар сонини 10 мингга олиб чиқишни ният қилишган.

Албатта, бу ишларга Қумқўрғон туман ҳокими Раҳматулла Гаффаров бош-қош бўлмоқда. Футболнинг ашаддий мухлиси ҳисобланган ушбу раҳбар «Қумқўрғон»ни ривожлантириб, жамоани кейинги мавсумларда Про лигага олиб чиқишни мақсад қилган.

«Қумқўрғон-1977» Биринчи лиганинг дастлабки 4та ўйинидан кейин 1 ғалаба ва 3 дурангга эришган ҳолда 6 очко билан 16 жамоа орасида 6-поғонани эгаллаб турибди.