Surxondaryo viloyati Qumqo‘rg‘on tumanining «Qumqo‘rg‘on» jamoasi joriy mavsumda o‘z tarixida ilk marta Birinchi liga musobaqasida ishtirok etmoqda. Jamoa stadioni mavsum avvalida sha’y holat bo‘lmagani uchun klub dastlabki 3ta o‘yinni safarda o‘tkazishiga to‘g‘ri keldi. 4-turdan o‘rin olgan o‘yin esa qumqo‘rg‘onlik muxlislar uchun haqiqiy bayramga aylandi.

Toshkent shahrining "Do‘stlik" klubiga qarshi o‘yinni tomosha qilish uchun, Ramazon oyi bo‘lishiga qaramay, stadionga 4-5 ming atrofida ishqiboz tashrif buyurdi. Uchrashuv komissari Ongar Jalimov esa qaydnomaga 3200 nafar muxlisni qayd etgan. Ammo guvohlarning aytishicha, stadionga kelgan tomoshabinlar soni bundan ancha ko‘p bo‘lgan.

«Qumqo‘rg‘on» klub mutasaddilari muxlislarning stadionga kelishlari uchun ko‘p ishlarni amalga oshirishdi. Ular chekka-chekka qishloqlargacha borib, tashviqot ishlarini olib borishdi, aholi gavjum joylarga reklama bannerlarini ilishdi. Bu esa o‘z samarasini bera boshladi. Klub rahbariyati jamoaning navbatdagi uy uchrashuvlarida muxlislar sonini 10 mingga olib chiqishni niyat qilishgan.

Albatta, bu ishlarga Qumqo‘rg‘on tuman hokimi Rahmatulla Gaffarov bosh-qosh bo‘lmoqda. Futbolning ashaddiy muxlisi hisoblangan ushbu rahbar «Qumqo‘rg‘on»ni rivojlantirib, jamoani keyingi mavsumlarda Pro ligaga olib chiqishni maqsad qilgan.

«Qumqo‘rg‘on-1977» Birinchi liganing dastlabki 4ta o‘yinidan keyin 1 g‘alaba va 3 durangga erishgan holda 6 ochko bilan 16 jamoa orasida 6-pog‘onani egallab turibdi.