"Манчестер Юнайтед"нинг 37 ёшли яримҳимоячиси Пол Скоулз ўзининг Англия терма жамоасига қайтиши масаласида бош мураббий Рой Ҳожсон билан музокара ўтказишга тайёр, деб хабар бермоқда The Guardian.
Эслатиб ўтамиз, инглизнинг аввалги бош мураббийи Фабио Капелло Скоулзга ЖАРда бўлиб ўтган ЖЧ-2010га боришни таклиф қилган эди, бироқ "малласоч қария" бу таклифни рад этиб, кейинроқ ўз қароридан пушаймонда эканлигини айтиб ўтган эди.
Жорий мавсумда ўзининг футболчилик карьерасини тиклаб олган Скоулзда энди иккинчи имконият пайдо бўлмоқда ва яримҳимоячи чоршанба кунгача – Англия терма жамоасининг ЕВРО-2012 учун "заявка"си эълон қилинадиган кунгача бош мураббий билан гаплашиб олиши керак.
Қўшича қилиш мумкинки, Скоулз Англия терма жамоаси сафида 66 ўйинда майдонга тушган. Эътиборлиси, энг сўнгги марта 2004 йилда. Пол Скоулзнинг олида Еврода қатнашиш имконияти билан биргаликда яна бир муҳим масала кўндаланг бўлиб турибди: "МЮ" билан имзоланган ва якунланган шартномасини чўздириш ёки чўздирмаслик.
