Тен Хаг "Манчестер Юнайтед"ни янгидан қуриш учун келаётгани аниқ бўлиб улгурди. У ёзда ўзининг услубига мос тушадиган футболчиларга эътибор қаратиши турган гап. Қуйида ўтмишда тен Хагнинг шогирди бўлган ва "МЮ" учун нишонга айланиши эҳтимол қилинган футболчиларнинг айримларига тўхталиб ўтамиз.
Френки де Йонг – "Барселона"
Тен Хаг ҳамда де Йонг ўртасида "Аякс"даги даврдан бери яқин муносабатлар мавжуд. Ярим ҳимоячи "Аякс"да ўз дебютини тен Хаг келишини бир йил олдин ўтказади. Аммо айнан тен Хаг даврида 24 ёшли футболчи юксак даражага чиқди. У "Аякс"да энг яхши футболчи эди. Шу сабаб уларни яна бирга кўришимиз мумкин. Аммо бу сафар "МЮ" сафида.
Антони – "Аякс"
Бразилиялик ҳужумчи тен Хагнинг "Аякс"ида Европадаги энг яхши талант эканини кўрсатиб бера олди. "МЮ" уни ўтган йили кузатувга олганди. У пайтлар тен Хагнинг АПЛга келиши борасида гап-сўзлар мавжуд бўлмаган. Антонига "Ливерпуль" ҳам жиддий қизиқиш билдира бошлаган. Аммо Эрик тен Хагнинг таъсири остида, унинг "МЮ"га келиш эҳтимоли юқорироқ баҳоланади.
Нуссаир Мазрауи – "Аякс"
Марокаш терма жамоаси аъзоси яхши даража ва спорт формасига эга. У ёзда эркин агентга айланади. Ҳимоячи "МЮ"га асқотиши мумкин. Негаки, ўнг қанот ҳимояси "қизил иблислар"нинг нозик нуқтасидан биридир. Шунга қарамай, Мазрауи учун "Бавария" ҳам даъвогар ва Германия чемпиони уни илиб кетишга анча яқиндир.
Маттейс де Лигт – "Ювентус"
Де Лигт ҳам худди де Йонг каби тенг Хагнинг "Аякс"даги ишлари маҳсули эди. "Ювентус" футболчиси ўз вақтида дунёнинг энг ёш ва ёрқин ҳимоячисига айланганди. Шубҳасизки, тен Хаг уни яна ўз жамоасида кўришни хоҳлаган бўлар эди. Аммо уни сотиб олиш осон бўлмайди. Негаки, "Ювентус" ҳимояси айнан унга қурилган. Шу сабаб, туринликлар уни камида 100 миллион фунтга баҳолаган бўларди. Бу эса исталган жамоага қимматлик қилади.
Себастьян Аллер – "Аякс"
Яна бир "Аякс" юлдузи Аллер – тен Хаг севимлиларидан бири. У 2021 йилда "Вест Хэм"дан олиб келинади. Ивуарлик ҳужумчига Англия футболи тўғри келмади. Нидерландияда эса Аллер ҳақиқий юлдузга айланди. Шу сабаб "Вест Хэм" уни қайта сотиб олиши ўйламоқда. Аммо унинг йўлида "МЮ"дек катта муаммо вужудга келди. Кўрамиз, Аллер жаноблари кимга насиб қиларкин...
Жалолиддин ИСМАТОВ таржимаси
