"Реал"дан қабул қилиб олинган қақшатқич зарба охир-оқибат "Манчестер Сити"ни катта ва кескин фарқли трансферга ундади. Балки аввалдан Холанд варианти кун тартибида бўлгандир, аммо "Этиҳад"да Фоден зарбдор нуқтадан гол уролмагач, позицияли ҳужум вақти зарба берувчи Де Брюне майли, Ляпорт бўлиб қолгач, энди ҳаракатларни тезлатиш тўғри бўларди. Менимча, Пеп йўлланмани Манчестерда ютқазди, Мадридда эмас.

Икки ўйинда "Реал"дан кимлар гол урди? Бензема, Винисиус ва Родриго. Барчаси ҳужумчи. Асли энг тўғриси ва осони шу эмасми?

Гвардиола Холанд билан принципларидан жуда кечди деб ўйламайман-у, лекин уларни таҳрир қилишга мажбур бўляпти.

Аслида мутахассис "Атлетико Мадрид"га қарши жавоб ўйинининг иккинчи таймида буткул ажаблантирганди. Мен Гвардиола ниҳоят қарашларидан воз кечибди, деб ўйлагандим. "Реал"га қарши иккинчи ўйинда ҳам голдан кейин ёпилиб олса, вақтдан ютишга уринса керак, деб кутдим. Йўқ, ундай бўлмади. Аксинча, Грилишнинг вазиятларини эсланг (Грилишнинг ўзи алоҳида мавзу).

Холанд билан "Сити" кучайиши аниқ. Норвегиялик учун эса бу охирги нуқта ҳам бўлмайди. Шуниси чоғлаб туради уни. Яъни, Эрлинг яқин беш-олти йилда "Реал" ёки "Барселона"да ўйнаш учун ҳам интилади. Барибир ҳар қанақасига ҳар қайси суперюлдуз учун охирги нуқта шу икки жамоа бўлиб қолса керак.

Ориф Толипов.