"Барселона" ўзининг расмий сайтида ҳимоячи Роналд Араухонинг соғлиғи ҳақида маълумот берди. У Испания чемпионатининг 36-туридан ўрин олган "Сельта"га қарши ўйинни якунлай олмади.
23 ёшли уругвайлик футболчи учрашувнинг иккинчи ярмида жамоадоши Гави билан тўқнашиб кетди ва ҳушини йўқотди. Футболчига зудлик билан тиббий ёрдам кўрсатилди. Уни тез ёрдам машинасида майдондан олиб кетишди.
Клуб баёнотида айтилишича, Араухонинг мияси чайқалган ва кейинги текширув учун шифохонага олиб кетилган.
Аввалроқ, уругвайлик футболчи мутахассислар назорати остида қолиш ва барча керакли тестлардан ўтиш учун бироз вақт касалхонада ётиши кераклиги маълум бўлган эди.
Ҳимоячи касалхонага ётқизилганидан кейин "Барселона" - "Сельта" ўйини давом этди. Клеман Лангле жароҳат олган Араухо ўрнига майдонга тушди.
