Мадриднинг “Реал” клуби ҳимоячиси Давид Алаба жароҳатидан фориғ бўлди ва майдонга қайтишга тайёр.
Mundo Deportivo нашрининг хабарига кўра, Карло Анчелотти Испания чемпионатининг навбатдаги тур доирасида "Бетис" жамоасига қарши бўлиб ўтадиган ўйинида австриялик футболчига умид боғлаши мумкин.
Эслатиб ўтамиз, Алаба Чемпионлар лигасининг биринчи ярим финалида "Манчестер Сити"га қарши ўйинда жароҳат олган эди. Ўз ўрнини Начога бўшатиб берган австриялик футболчи шундан бери майдонга тушмади.
Алаба "Реал"га 2021 йилнинг ёзида "Бавария"дан текинга ўтган эди. Австриялик футболчи "қаймоқранглилар"нинг энг кўп маош олувчи футболчиларидан бири ҳисобланади.
