10 май куни Ўзбекистон ўсмирлар терма жамоаси Осиё Чемпионати финал босқичидаги рақиблариномини билиб олган эди. Орадан уч кун ўтиб Ўзбекистон ёшлар терма жамоасининг гуруҳдошлари номи ҳам маълум бўлганди.
 
Мос равишда Эрон ҳамда БАА мамлакатларида бўлиб ўтадиган мусобақаларга ташланган қуръа якунларига кўра Терма жамоалар маркази Мураббийлар кенгашининг йиғилиши бўлиб ўтди. Унда номи зикр этилган терма жамоаларнинг бош мураббийлари – Дилшод Нуралиев ҳамда Аҳмаджон Мусаев, шунингдек, 14 ёшгача бўлган Ўзбекистон ўсмирлар терма жамоаси бош мураббийи Темур Алимхўжаев, селекция ишлари бўйича Марказ илмий ходимлари раҳбарият билан учрашишди.
 
Йиғилишда Осиё Чемпионати гуруҳ босқичидаги рақибларни яхшилаб ўрганиб чиқиш терма жамоа мураббийлари олдига вазифа қилиб қўйилди. Бундан ташқари, қисқа вақт ичида улар қитъа биринчилигига тайёргарлик режасини ҳам тузиб чиқишлари керак бўлади. Ушбу режаларда ҳам Ўзбекистондаги, ҳам хориждаги йиғинлар ҳам ўрин олади.
 
Таъкидлаш жоиз, Осиё Чемпионатига тайёргарлик жараёнида терма жамоа мураббийлари Ўзбекистоннинг турли вилоятларида бўлиб, клублар Ўзбекистон терма жамоаларига номзод футболчилар билан қандай иш олиб бораётганликларини кузатишади.