"Манчестер Сити" ярим ҳимоячиси Фернандиньо ёзда эркин агент сифатида жамоани тарк этади. Бу ҳақда Фабрицио Романо хабар тарқатмоқда.

Манбанинг хабарига кўра, футболчи оиласи билан Бразилияга қайтишни истамоқда. Фернандиньо ўз фаолиятини бошлаган "Атлетико Паранаэнсе" клуби билан шартнома имзолашга яқин турибди.

Фернандиньо 2013 йилда Донецкнинг «Шахтёр» клубидан 40 миллион евро эвазига «Манчестер Сити»га ўтган эди. Тўққиз йил давомида у “шаҳарликлар” сафида барча мусобақаларда 382 та ўйин ўтказиб, 26 та гол урди ва 33 та голли узатмани амалга оширди.

37 ёшли бразилиялик футболчи ушбу мавсумда “Манчестер Сити” сафида 32 та ўйинда майдонга тушиб, 2 та гол ва 3 та голли узатмага муаллифлик қилган. Transfermarkt портали ярим ҳимоячини 2 миллион еврога баҳоламоқда.