"Manchester Siti" yarim himoyachisi Fernandinyo yozda erkin agent sifatida jamoani tark etadi. Bu haqda Fabrisio Romano xabar tarqatmoqda.

Manbaning xabariga ko‘ra, futbolchi oilasi bilan Braziliyaga qaytishni istamoqda. Fernandinyo o‘z faoliyatini boshlagan "Atletiko Paranaense" klubi bilan shartnoma imzolashga yaqin turibdi.

Fernandinyo 2013 yilda Doneskning «Shaxtyor» klubidan 40 million yevro evaziga «Manchester Siti»ga o‘tgan edi. To‘qqiz yil davomida u “shaharliklar” safida barcha musobaqalarda 382 ta o‘yin o‘tkazib, 26 ta gol urdi va 33 ta golli uzatmani amalga oshirdi.

37 yoshli braziliyalik futbolchi ushbu mavsumda “Manchester Siti” safida 32 ta o‘yinda maydonga tushib, 2 ta gol va 3 ta golli uzatmaga mualliflik qilgan. Transfermarkt portali yarim himoyachini 2 million yevroga baholamoqda.