ОЧЛнинг “Н” гуруҳида 1-ўринни эгаллаб, нимчорак финал йўлланмасини қўлга киритган Хитойнинг “Гуангчжоу Эвергранд” жамоаси италиялик машҳур мураббий Марчелло Липпи билан шартнома имзолаганини расман маълум қилди.

Липпининг жамоага келиши билан кореялик мураббий Ли Чан Сун бош мураббийлик лавозимини бўшатиб берди. Италия мутахассис клуб билан ўзининг илк халқаро ўйинини 30 май куни “Токио” ФК (Япония) билан ўтказади. Ли клуб сафида ўз фаолиятини давом эттирадими ёки йўқми, ҳали буниси номаълум.

Клуб пайшанба куни қуйидаги баёнотни тарқатди: “Жамоанинг стратегик мақсадларидан келиб чиқиб, шундай қарорга келинди: “Гуангчжоу Эвергранд” жамоаси Марчело Липпи билан 2 йилу 6 ойлик шартнома имзолади”.

“Ювентус” ва “Интер” клубининг собиқ мураббийи ва 2006 йили Жаҳон чемпионлигини қўлга киритган мураббий ЖЧ-2010даги омадсизликдан кейин ишсиз юрганди. “Эвергранд” шунингдек “Боруссия” (Дортмунд) жамоаси футболчиси Лукас Бариосни ҳам ўз сафига қўшиб олди.

Ташкил этилган матбуот анжуманида Липпи қуйидагиларни таъкидлади:
“Мен бунгача ёрдамчиларимни жамоанинг ўйинларини кузатиш учун юборгандим. Уларнинг фикрлари қарор қабул қилишим учун етарли бўлди. Хитойга келганимдан ҳайратдаман”.

Липпининг миллий чемпионат доирасидаги илк ўйини “Цингдао Цзонун”га қарши бўлиб ўтади.