"Интер" футболчилари, яъни ярим ҳимоячи Артуро Видаль ва ҳужумчи Алексис Санчес кейинги трансфер ойнасида клубни тарк этишади, деб ёзади журналист Фабрицио Романо.

Манбага кўра, футболчилар аллақачон янги клуб топиш устида ишламоқда. Артуро Видаль Бразилиянинг "Фламенго" клуби билан жиддий музокаралар олиб бормоқда.

33 ёшли Алексис Санчес жорий мавсумда “Интер” сафида А Серияда 27 та ўйинда майдонга тушиб, 5 та гол урди ва 3 та голли узатмани амалга оширди.

35 ёшли Видаль 28 та ўйинда майдонга тушиб, битта гол ва битта голли узатмага муаллифлик қилган.