ПСВ ярим ҳимоячиси Марио Гётце фаолиятини "Милан"да давом эттириши мумкин, дея хабар беради журналист Патрик Бергер.
Манбанинг хабарига кўра, Италия клуби раҳбарияти футболчининг вакиллари билан аллақачон музокара ўтказган. Немис футболчисига "Милан"дан ташқари Лиссабоннинг "Бенфика" клуби ҳам қизиқиш билдирмоқда.
29 ёшли ярим ҳимоячининг Голландия клуби билан шартномаси 2024 йилнинг ёзига қадар амал қилади. Футболчининг шартномасида 4-5 миллион евро миқдорида товон пули тўлаш банди бор. Трансфермаркт Гётцени 12 миллион еврога баҳолаган.
Ярим ҳимоячи ўтган мавсумда ПСВ сафида 52 ўйинда майдонга тушиб, 12 гол урган ва 11 голга ассистентлик қилган.
Эслатиб ўтамиз, футболчи аввалроқ Мюнхеннинг "Бавария" ва "Боруссия Дортмунд" каби клубларни ҳимоя қилган. Шунингдек, у ЖЧ-2014 финали доирасидаги Германия - Аргентина учрашуви (1:0) ғалаба голи муаллифи ҳисобланади.
