Роберт клуб уни қўйиб юборишни истамаганидан ғазабланганга ўхшайди. Аммо унинг қаерга кетаётгани аллақачон аниқ.
Роберт Левандовски ёзги трансфер ойнасида ҳақиқатан ҳам клубини ўзгартирадиганга ўхшайди. "Бавария" ҳужумчиси энди Польша терма жамоаси ихтиёрида бўлиб, у билан Миллатлар лигаси ўйинларига тайёргарлик кўрмоқда. Охирги матбуот анжуманида Роберт ҳақиқатда мюнхенликлар жамоасидан кетишини эълон қилди.
"Бавария" жиддий клуб. Ишонаманки, улар мени ушлаб қолишмайди. Мен у ерда бошқа ўйнашни хоҳламайман.
Қизиғи шундаки, дастлаб Левандовски шарҳининг нотўғри таржимаси тармоққа кирган. Ушбу версияда Роберт "Бавария"ни жиддий бўлмаган клуб деб атаган, аммо янгиланиш туфайли кенг кўламли жанжал тезда йўқ бўлиб кетди. Шунга қарамай, ўйнашни истамаслик ҳақидаги сўзларни ҳам эътиборсиз қолдирмаслик керак. "Бавария" ўзини суперклуб сифатида кўрсатмоқда ва юлдузлар билан бу тарзда хайрлашишга одатланмаган.
Январь ойида Роберт ФИФА йилнинг энг яхши футболчиси совринини олди. "Бавария" бошқаруви раиси Оливер Кан ҳужумчини феномен деб атади ва Левандовскининг келажаги ҳақида ҳаммаси аниқ бўлиб туюлди. Унинг шартномаси 2023 йилнинг ёзига қадар мўлжалланган, аммо Мюнхен клуби юлдузлари одатда шараф билан қариганда кетади (Роббен ва Риберини эсланг).
Ва кейин миш-мишлар тарқала бошлади. Немис ОАВлари Левандовски ёзда кетиши мумкинлиги ҳақида хабар берган, «Бавария» директори Ҳасан Салиҳамиджич футболчини сақлаб қолиш истагини билдирган, Роберт эса янги шартнома ҳақида биринчи марта эшитаётганини айтди.
“Бавария” президенти Герберт Хайнер миш-мишларга қарши курашиб, клуб Левандовски билан “жуда хотиржам” музокара олиб бораётганига ишонтирди, аммо янгиликларнинг дўллари тўхтамади. Мюнхенда улар бундан норози бўлишди - Кан кетишга ҳеч қандай сабаб йўқлигини айтди, бош мураббий Юлиан Нагелсманн эса "Бавария" Робертни сақлаб қолишни хоҳлаётганини таъкидлади. Ҳатто немис ОАВларида клуб Левандовскининг маошини оширишга тайёрлиги ҳақида хабарлар пайдо бўлди.
Левандовскининг ўзи эса оловга фақат ёғ қуйди. Роберт "Бавария"да қолиш истаги ҳақидаги саволларга жавоб бермади. Қолаверса, Левандовски Нагелсманнинг ишидан норозилиги, унинг тактик қарорларини очиқчасига танқид қилиши ва Мюнхенда ўйнаб, “Олтин тўп”ни қўлга кирита олмаслигига ишониши ҳақида маълумотлар бор эди. Салиҳамиджич эса Роберт кейинги мавсумда албатта "Бавария"да қолишини яна бир бор айтганида, бу сўзлар футболчининг жаҳлини чиқаргани маълум бўлди.
Левандовски ва "Бавария" ўртасида музокаралар давом этаётганди, аммо ижобий хабар йўқ эди. Аксинча, Роберт клуб таклифидан ҳафсаласи пир бўлган ва ўзини қадрли ҳис қилмаётгани учун кетишни хоҳлагани маълум бўлди. 14 май куни эса мавсумнинг сўнгги ўйинидан сўнг Левандовски ўз сўзларига аниқлик киритди. У "эҳтимол, "Бавария" учун сўнгги ўйинни ўтказганини" айтди ва клубни шартномани узайтиришни истамаслиги ҳақида маълум қилганини тан олди.
"Бавария"да Левандовскининг сўзлари провокация сифатида қабул қилинди. Кан Роберт шартномани охиригача якунлашини айтди ва Салиҳамиджич футболчининг агенти Пини Захавига “ҳужум қилди”.
Шундан кейин тинчликка эришиш деярли имконсиз эди. Агент "Бавария" Левандовскини нафақат футболчи, балки шахс сифатида ҳам йўқотиб қўйганини айтди.
Левандовски қаерга кетади? Янги клуб билан ҳаммаси аён бўлгандек
Робертнинг янги шартнома бўйича музокаралари муваффақиятсизликка учрагани маълум бўлгач, унинг ортидан Европа топ клубларнинг навбати пайдо бўлди. Малум бўлишича, Левандовскига "Атлетико", "ПСЖ", "Челси", "Манчестер Сити" ва "Ливерпуль" клублари қизиқиш билдирмоқда. Аммо энди ҳамма нарса "Барселона" Робертнинг кейинги клуби бўлишига ишора қилмоқда.
ОАВ маълумотларига кўра, Левандовски "Барселона" билан 3 йиллик шартнома имзолайди ва йилига солиқлар билан тахминан 40 миллион евро олади. Роберт учун Каталония устувор ва у бошқа ҳеч ким билан музокаралар олиб бормайди деган фикрлар мавжуд.
Айни дамда ягона муаммо - "Барселона" ва "Бавария" ўртасидаги музокаралар. Дастлаб клублар трансфер суммаси борасида жуда бошқача фикрларга эга эди. “Бавария” 70-80 миллион евро олмоқчи эди, “Барса” эса 30 миллион евродан кўп бўлмаган пул беришга тайёрлигини маълум қилди .Кейинчалик, мюнхенликларнинг сўровлари сезиларли даражада камайди (улар 40 миллион евро ҳақида ёзишган). Охирги маълумотларга кўра, "Барселона" Левандовски учун 35 миллион евро таклиф қилган, бироқ клублар ўртасида ҳалигача келишув йўқ экан.
