"Реал Мадрид" клуб билан шартномаси июнь ойи охирида якунига етадиган ярим ҳимоячи Иско билан хайрлашди.

30 ёшли испаниялик "қаймоқранглилар" сафига 2013 йилда келиб қўшилганди. Ярим ҳимоячи клуб сафида 353 ўйин ўтказиб, 53 гол урган ва 56 голга ассистентлик қилган.

"Унинг намойиш этган футболи муваффақиятлар ва унутилмас лаҳзаларга тўла бу узоқ йўлни у билан бирга ўтказган барча мадридлик футболчиларда из қолдирди. "Реал Мадрид" ҳар доим унинг уйи бўлиб қолади. Унга ва бутун оиласига омад тилайди", - дейилади клуб баёнотида.

Клуб, шунингдек, шартномаси ҳам июнь ойи охирида тугайдиган ҳужумчи Гарет Бэйл билан ҳам хайрлашди. 2013 йилда “Реал”га ўтган 32 ёшли уэльслик футболчи ҳисобида 258 та ўйин, 106 та гол ва 67 та голли узатма бор.

"Реал Мадрид" бу клубнинг абадий афсонасига айланадиган футболчи Гаретга ўз севги ва миннатдорчилигини билдиради. Клуб ҳар доим унинг уйи бўлиб қолади", - дейилади клуб баёнотида.

Олдинроқ Иско "Бетис", "Севилья" ёки "Рома"га ўтиши мумкинлиги ҳақида хабарлар тарқалган эди.