Eurosport телеканалининг хабар беришича, энди футбол ҳакамлари ҳам допинг қабул қилинганликни аниқлаб берувчи тестлардан ўтказилади.

Одатда футболчиларни текширишда фойдаланиладиган тестдан ҳакамларнинг ҳам ўтиши мажбурий қилиб белгиланиши борасида ФИФА тиббий хизмати раҳбари Иржи Дворжак айтиб ўтган. Унинг таъкидлашича, ҳакамлар иши ўйиннинг ажралмас бир қисми ҳисобланади.

ФИФА ижроия қўмитаси аъзоси, бельгиялик Мишель Д’Угенинг фикрича, футбол ҳакамлари ҳам худди футболчилар сингари спортчи ҳисобланишади, шу сабабли уларга ҳам худди шундай қоида қўлланилиши лозим.

Goal.com интернет-нашрининг хабар беришича, ҳакамлар ўйинлардан аввал допинг-назоратдан ўтишади. Айни пайтда ҳакамлар допинг-тестдан ўтмайди, шунчаки жисмоний тайёргарлик бўйича имтиҳон топширишади.