Гарчи Муҳаммад Салоҳ сермаҳсуллик бобида мавсумни ёмон ўтказмаган бўлсада, сўнгги бир йилликни фаолиятидаги энг ёмони сифатида қабул қилса, ажабмас. Бунинг сабабларига тўхталамиз.
Африка кубоги финалидаги мағлубият
«Қора қитъа» чемпионатининг ҳал қилувчи ўйинида Сенегал термасига қарши тўп сурган мисрликлар пенальтилар сериясида имкониятни бой беришди. Учрашувдан сўнг Салоҳнинг сенегаллик клубдоши Садио Мане унинг ёнига келиб, юпатишга уринганди.
ЖЧ саралашида таниш сценарий
Қатарда ўтадиган мундиал йўлланмаси учун кечган саралаш учрашувида яна Сенегал ва Миср термалари ўзаро куч синашишди. Биринчи ўйинда «эҳромлар юрти» вакиллари 1:0 ҳисобида ғалаба қозонишганди, жавоб баҳсида сенегалликлар айни кўринишда устун келишди. Пенальтилар сериясида ғолиб чиққан Мане жамоаси ЖЧ чиптасига эга бўлди. Салоҳ яна омадсизлар сафида!
АПЛдаги нохуш якун
Ҳа, Англия Премьер-лигасининг сўнгги мавсуми охирги турнинг охирги дақиқаларигача мухлисларга интрига бағишлади. «Ливерпуль» «Вулверхэмптон»ни енгсаю, «Манчестер Сити» очко йўқотса, туманли ўлка чемпионлиги «қизиллар»га насиб этарди. Гарчи Муҳаммад Салоҳ ўз голи билан жамоаси ғалабасига ҳисса қўшган бўлсада, параллель кечган баҳсда Пеп Гвардиола шогирдлари чиройли «камбэк» эвазига ғолибликни нақд қилишди.
Реванш амалга ошмади
«Ливерпуль» Чемпионлар Лигаси финалида «Реал»га тўқнаш келди. Бу онларни Салоҳ 4 йил кутганди, «қироллик клуби»дан ўч олишни истади. Ёдингизда бўлса, 2018 йилги ЕЧЛ финалида Серхио Рамос билан тўқнашиш оқибатида жароҳат олган мисрлик ҳужумчи майдонни кўзида ёш билан тарк этганди. Афсуски, у истаган реванш амалга ошмади. «Реал» 1:0 ҳисобидаги ғалаба эвазига «шалпангқулоқ»ни ўзиники қилди.
Юқоридаги маълумотлардан кейин ҳам, Салоҳ учун бу фаолиятидаги энг омадсиз мавсум бўлганига кимнингдир қалбида шубҳа уйғониши мумкинми?
Р.ИБРОҲИМОВ тайёрлади
