Garchi Muhammad Saloh sermahsullik bobida mavsumni yomon o‘tkazmagan bo‘lsada, so‘nggi bir yillikni faoliyatidagi eng yomoni sifatida qabul qilsa, ajabmas. Buning sabablariga to‘xtalamiz.
Afrika kubogi finalidagi mag‘lubiyat
«Qora qit’a» chempionatining hal qiluvchi o‘yinida Senegal termasiga qarshi to‘p surgan misrliklar penaltilar seriyasida imkoniyatni boy berishdi. Uchrashuvdan so‘ng Salohning senegallik klubdoshi Sadio Mane uning yoniga kelib, yupatishga uringandi.
JCH saralashida tanish ssenariy
Qatarda o‘tadigan mundial yo‘llanmasi uchun kechgan saralash uchrashuvida yana Senegal va Misr termalari o‘zaro kuch sinashishdi. Birinchi o‘yinda «ehromlar yurti» vakillari 1:0 hisobida g‘alaba qozonishgandi, javob bahsida senegalliklar ayni ko‘rinishda ustun kelishdi. Penaltilar seriyasida g‘olib chiqqan Mane jamoasi JCH chiptasiga ega bo‘ldi. Saloh yana omadsizlar safida!
APLdagi noxush yakun
Ha, Angliya Premyer-ligasining so‘nggi mavsumi oxirgi turning oxirgi daqiqalarigacha muxlislarga intriga bag‘ishladi. «Liverpul» «Vulverxempton»ni yengsayu, «Manchester Siti» ochko yo‘qotsa, tumanli o‘lka chempionligi «qizillar»ga nasib etardi. Garchi Muhammad Saloh o‘z goli bilan jamoasi g‘alabasiga hissa qo‘shgan bo‘lsada, parallel kechgan bahsda Pep Gvardiola shogirdlari chiroyli «kambek» evaziga g‘oliblikni naqd qilishdi.
Revansh amalga oshmadi
«Liverpul» Chempionlar Ligasi finalida «Real»ga to‘qnash keldi. Bu onlarni Saloh 4 yil kutgandi, «qirollik klubi»dan o‘ch olishni istadi. Yodingizda bo‘lsa, 2018 yilgi YECHL finalida Serxio Ramos bilan to‘qnashish oqibatida jarohat olgan misrlik hujumchi maydonni ko‘zida yosh bilan tark etgandi. Afsuski, u istagan revansh amalga oshmadi. «Real» 1:0 hisobidagi g‘alaba evaziga «shalpangquloq»ni o‘ziniki qildi.
Yuqoridagi ma’lumotlardan keyin ham, Saloh uchun bu faoliyatidagi eng omadsiz mavsum bo‘lganiga kimningdir qalbida shubha uyg‘onishi mumkinmi?
R.IBROHIMOV tayyorladi
