Якшанба куни “Бунёдкор” жамоаси Жанубий Кореяга келганидан буён ўзининг иккинчи машғулотини ўтказди. Агар кеча футболчиларимиз “Сонгнам” спорт комплекси майдонида шуғулланишган бўлса, бу галги машғулот “Анянг” спорт комплекси стадионида бўлиб ўтди.
Дарвозабонлар – Игнатий Нестеров ва Акбар Тўраевлар билан, ҳар доимгидек, посбонларимиз мураббийи Абдусаттор Раҳимов ишлади. Қолган 17 нафар футболчи бош мураббий Миржалол Қосимов ва унинг ёрдамчилари Мурод Отажонов ҳамда Ҳикмат Эргашевлар қўл остида шуғулландилар.
Бир ярим соат вақт мобайнида давом этган машғулотда футболчиларимиз кўпроқ тактик ҳаракатларга эътибор қаратишди. Олиб борилаётган машқларнинг жиддийлиги ва ранг-баранглилигидан “Бунёдкор” муҳим учрашувга ўта катта масъулият билан тайёргарлик кўраётганини шундоққина билиб олса бўлади. Тезкор корейсларга қарши жавобан шундай катта тезликда тўп суриш ҳамда тўпни ўзларида кўпроқ назорат қилиш устида ишлаш суратлари сезилди футболчиларимизнинг машғулотидан.
“Қалдирғочлар”нинг бугунги – расмий машғулоти 29 май куни учрашув ўтказиладиган стадионда, “Танчон” спорт комплексида ташкил этилади.
