Мальорка фуқаролик гвардияси "Манчестер Юнайтед" ҳужумчиси Криштиану Роналдуга тегишли ҳашаматли Бугатти спорткарининг ҳайдовчиси кимлигини текширмоқда.

Испаниянинг Marca нашри хабарига кўра, Мальорка провинциясида автомобил йўлдан чиқиб кетиб, девор билан тўқнашиб кетган. Ҳодисалар бугун, 20 июнь куни эрталаб маҳаллий вақт билан соат 12 лар атрофида содир бўлган.

Манбанинг хабарига кўра, қиймати икки миллион евро бўлган Бугатти автомобилида бўлган одамлар воқеа жойини тарк этган. Бироқ, кейинроқ уларнинг номидан бир киши келиб, содир бўлган воқеа учун жавобгарликни ўз зиммасига олди.

Бахтсиз ҳодиса Са Кома қишлоғида газ баллонлари сақланадиган йўлга туташган бинога моддий зарар етказди. Баъзи манбалар машинани футболчи эмас, балки унинг ходими бошқарганини кўрсатмоқда.

Эслатиб ўтамиз, 37 ёшли Роналду айни кунларда Мальоркада рафиқаси ва болалари билан дам олмоқда.