Осиёда 22-23 ҳамда 29-30 май кунлари ўтказилган Чемпионлар лигаси 1/8 финал учрашувларидан сўнг қитъамизнинг клублар учун энг нуфузли турнирида энг сара 8 иштирокчи қолди. Булар: “Сепахон” (Эрон), “Ал-Аҳли”, “Ал-Иттиҳод” ва “Ал-Ҳилол” (барчаси - Саудия Арабистони), “Аделаида Юнайтед” (Австралия), “Бунёдкор” (Ўзбекистон), “Ульсан Хёндэ Хоранг-и” (Жанубий Корея) ҳамда “Гуанчжоу Эвергранде” (Хитой).

14 июнь (пайшанба) куни ОЧЛнинг ҳал қилувчи босқичларига - 1/4 финал, 1/2 финал ҳамда финал ўйинларига бирдан қуръа ташланади.

Эслатиб ўтамиз, чорак финал учрашувлари - 19 сентябрь ва 2-3 октябрь кунлари, ярим финаллар - 24 ва 31 октябрь кунлари, финал баҳси эса 9/10 ноябрга мўлжалланган. Финал беллашуви битта баҳсдан иборат ҳамда финалчи клублардан бирининг майдонида ўтказилади. Буни ҳам 14 июнь кунги қуръа аниқлаб беради.

Қуръа ташлаш маросими Малайзия пойтахти Куала-Лумпур шаҳрида ОФК қароргоҳида бўлиб ўтади. ОЧЛ қуръаси Тошкент вақти билан соат 13:00да бошланади.

Ҳозир мусобақада 6та мамлакат вакиллари қолган. Қуръа тамойилларига кўра, агар чорак финалга қайсидир давлатдан иккита клуб чиқса, улар 1/4 финалда учрашмайдиган қилиб ажратиб юборилади. Аммо бирор мамлакатдан чорак финалга иккитадан кўп жамоа йўл оладиган бўлса, бу ҳолда ушбу юрт клублари 1/4 финалда ўзаро тўқнаш келишлари мумкин. Демак, биз ОЧЛ чорак финалида учта вакили бор Саудия Арабистони дербисига гувоҳ бўлиб қолишимиз ҳам эҳтимолдан ҳоли эмас. Гуруҳ босқичида битта гуруҳда тўп сурган клублар 1/4 финалда яна бир-бирлари билан рўбарў келишлари ҳам мумкин.

Шу куни, шунингдек, ОФК кубогининг ҳам ҳал қилувчи раундларига қуръа ташлаш маросими ташкил этилади (ОЧЛ қуръасидан бир соат олдин).