Бекободлик футбол мухлислари футбол учрашувларини янада завқ билан томоша қилиш имконига эга бўлишди.

Ўзбекистон Республикаси Президентининг 2011 йилнинг 19 январь ойидаги «2011 — 2013 йилларда республикада футболнинг моддий-техника базасини янада мустаҳкамлаш ва уни ривожлантиришга доир қўшимча чора-тадбирлар тўғрисида»ги Қарорида тўртта стадион – Самарқанддаги «Динамо», Бухородаги «Бухоро», Фарғонадаги «Фарғона» ва Намангандаги «Марказий» стадионини реконструкция қилиш, шунингдек, яна тўртта янги стадион қуриш белгиланган эди. Тошкентдаги «Бунёдкор» ҳамда Олмалиқдаги стадионнинг қурилиш ишлари давом этаётган бўлса, Тошкентдаги «Локомотив» стадиони сингари, Бекободдаги «Металлург» стадиони қурилиши якунига етиб бўлган.

Тошкентнинг «Локомотив» клуби ўзининг янги стадионида «Андижон»га қарши уй учрашувини қабул қилишга муваффақ ҳам бўлди. Шу вақтгача ўз уй учрашувларини Бекобод шаҳридаги А.Анохин номли стадионда ўтказиб келган маҳаллий «Металлург» клуби ҳам 2012 йилдан бошлаб ўз уй учрашувларини янги стадионда қабул қилиш имконига эга бўлади. 15 минг томошабинга мўлжалланган янги «Металлург» Марказий стадиони футболчилар ва футбол ишқибозларини қабул қилишга шай ҳолатга келган. Бекобод клуби Олий Лиганинг иккинчи даврасидан эътиборан ўз уй учрашувларини янги стадионда ўтказиши кутилмоқда.

 
Янги стадионга шу ердан кирилади.

 
Стадион чими футбол учрашувларини қабул қилишга шай.

 
Янги стадион 15 минг томошабинга мўлжалланган.

 
Эски стадионда мухлислар фақат бир томонда ўтиришар эди, янги стадионда эса майдоннинг ҳар тўрт тарафи мухлислар билан тўла бўлади.

 
Маъмурлар ва журналистлар ўйинни айнан шу ердан кузатиш имконига эга бўлишади.

 
А.Анохин номли стадион таблоси сабаб кўп танқид қилинарди. Янги стадионда табло муаммоси бўлмайди.