"Челси" Франциянинг "Лилль" клуби вингери Эден Азарни харид қилганини расман эълон қилди. Битим 32 миллион фунт-стерлингга баҳоланмоқда.
Эслатиб ўтамиз, ўтган ҳафтада 21 ёшли белгиялик ўз твиттерида "Чемпионлар Лигаси ғолибини танлагани"ни маълум қилган эди. Душанба куни Азар, ниҳоят, тиббий кўрикдан ўтди ва янги клуби билан шартнома имзолади.
Ўтган мавсумда 48 ўйинда майдонга тушиб, рақиблар дарвозасини 21 бор аниқ нишонга олган Азарни Англиянинг етакчи клублари: "Манчестер Сити", "Манчестер Юнайтед", "Тоттенҳэм" ва "Арсенал" ўз сафига қўшиб олиш учун "ов" бошлашган эди. Сўнгги пайтларда Азар бир-бирини инкор этувчи интервьюлар бера бошлаган, бироқ алал-оқибатда ўз карьерасини "Челси"да давом эттиришга қарор қилган эди.
"Мен бу ерга ўтишимни расмийлаштираётганимдан шодман. Бу ажойиб клуб ва мавсум бошланишини интиқлик билан кутмоқдаман", — деган у.
Энди терма жамоаси Евро-2012 да иштирок этмаётган Азар ёзги таътилга чиқади ва ўзининг янги клубдошлари билан мавсумолди тайёргарлиги чоғида учрашади.
Қайт этиб ўтиш жоизки, Азар "Вердер" вингери Марко Мариндан сўнг мавсум оралиғида "Челси" қўлга киритган иккинчи футболчи ва "кўклар"нинг бельгиялик тўртинчи ўйинчиси ҳисобланади. Маълумки, "Стэмфорд Бриж"даги клуб ёш ва иқтидорли футболчилар — Тибо Куртуа, Ромелу Лукаку ва Кевина Де Брюйнеларнинг ҳам ҳуқуқига эгалик қилади.
