Якунланган ҳафтада яна бир Олий лиги клубида мураббий ўзгарди. Ўтган мавсумнинг иккинчи қисмида "Бухоро" жамоасини қабул қилиб олган ёш мутахасис Жамшид Саидов ўз лавозимидан озод этилди. Унинг ўрнига яқиндан бошлаб клубда маслаҳатчи мураббий бўлиб ишлаб келаётган Тачмурод Агамуродов бош мураббий этиб тайинланди. Фурсатдан фойдаланиб янги лавозим билан мураббийни табриклаб, суҳбатлашишга муваффақ бўлдик.
- Тачмурод Шамакович, "Бухоро" клубида бош мураббий этиб тайинланишингиз қандай содир бўлди?
- Клуб раҳбарияти йиғилиш ўтказиб, жамоанинг бу йилги натижаларидан келиб чиққан ҳолда жамоа бош мураббийи лавозимига тайинлади. 2 июнь шанба кунидан эътиборан иш бошладим. Билдирилган ишончни оқлаш учун бор тажрибани ишга соламиз.
- Мураббийлар штабида ҳам ўзгаришлар қиласизми?
- Йўқ, ҳозирча бундай ниятим йўқ. Барча ўз ишини қилаверади. Олдинги йили Бухорода фаолият олиб борган Геннадий Кочнев эса спорт директории лавозимига сайланди.
- Клуб раҳбарияти олдингизга қандай вазифа қўйди?
- Дастлабки вазифамиз жамоанинг ҳозирги ҳолатдан олиб чиқиш. Биласиз айни дамда "Бухоро" чемпионатда сўнгги ўринда бормоқда. Биринчи давра якунигача ушбу хавфли зонадан қочишимиз керак. Кейин эса чемпионатимизнинг ҳар қандай клубига қаршилик кўрсата оладиган рақобатбардош жамоани ташкил этишимиз лозим бўлади.
- Демак, биринчи даврадан сўнг "Бухоро" таркибида янги футболчилар пайдо бўлади, шундайми?
- Албатта, вазифани амалга ошириш учун таркибни кучайтирмасак бўлмайди. Иккинчи даврада сафимизда янги футболчилар бўлади.
- Таклиф этиладиган футболчилар рўйхатини тузиб қўйган бўлсангиз керак?
- Албатта, "Бухоро"га таклиф этмоқчи бўлган янги футболчилар рўйхатини тузганман.
- Бу футболчилар ўзбекистонликми ёки легионерлар бўлишадими?
- Бу ҳақда гапиришга ҳали жуда эрта. Давралар оралиғида улар билан музокара ўтказамиз, агар келиша олсак жамоага келишади. Шундай экан ҳозирдан янги футболчилар борасида гапириш ноўрин. Вақти келса билиб оласизлар.
Усмон ИБОДОВ суҳбатлашди.
