Хитой 2023 йилги Осиё чемпионатига мезбонлик қилишдан бош тортганидан сўнг Осиё футбол конфедерацияси янги мезбонни аниқлаш мақсадида танлов эълон қилганди. Белгиланган муддат — 15 июлга қадар 4та мамлакатдан ариза келиб тушди. Улар:

Австралия
Индонезия
Жанубий Корея
Қатар.

Энди ушбу мамлакатларга ҳукумат доирасидаги кафолат билан боғлиқ ҳужжатларни тақдим этишлари учун 31 августга қадар вақт берилди. Шундан сўнг ОФК раҳбарияти даъвогарларнинг имкониятларини баҳолаб, мезбон мамлакат номини 17 октябрь куни эълон қилади.

Ариза топширган мамлакатлар орасида Австралия 2015 йилда қитъа чемпионатига мезбонлик қилган бўлса, 2011 йилги Осиё кубоги Қатарда ўтган. Индонезия эса 2007 йилда ўз қўшнилари — Малайзия, Таиланд ва Вьетнам билан биргаликда мусобақага мезбонлик қилган.

Қизиқ томони, Жанубий Корея сўнгги марта 1960 йилда Осиё кубогини ўзида қабул қилган экан.

Эслатиб ўтамиз, Осиё кубоги-2023да 24та жамоа иштирок этади. Ўзбекистон учинчи саралаш босқичи орқали турнир йўлланмасини қўлга киритди.