Ҳамюртимиз Шохжаҳон Эргашевнинг навбатдаги жанги жорий йилнинг 10 август куни АҚШнинг Детройт шаҳрида ўтказилади. Ушбу учрашув супер енгил вазн тоифасида (63,5) Шохжаҳон Эргашев ҳамда мексикалик Анхел Мартинес ўртасида кечади. Жанг 8 раунд этиб белгиланган.

Профессионал боксдаги фаолияти мобайнида 22 та жанг ўтказиб, барчасида ғалабага эришган ҳамюртимиз учун ушбу жанг 2022 йилдаги иккинчи муҳим мусобақадир.

– Мен машғулотлар жараёнида кундан кунга ўсаётганимдан, техник-тактик маҳоратимни ошираётганимдан хурсандман. Ҳар бир рақибимни ҳурмат қиламан. Унинг кучли томонларини ўрганаман. Зарур хулосалар чиқараман. Асосий эътиборим чемпионликка қаратилган. Келажакда ким билан учрашишимдан қатъий назар, у Риджис Прогрейс бўладими, супер енгил вазнда амалдаги жаҳон чемпиони Жош Тейлорми, Жек Кэттероллми барча-барчаси билан рўбарў келишга тайёрман, – дея интервью берган Ш.Эргашев, vRINGe сайти мухбирига.

Эслатиб ўтамиз, ҳамюртимиз энг сўнгги жангини жорий йилнинг май ойида аргентиналик Луис Альберто Веронага қарши ўтказиб, очколар ҳисобида ғолиб чиққанди.