“Барселона” клубининг нидерландиялик ҳужумчиси Мемфис Депай жамоани тарк этмаса, ўйин амалиётисиз қолиши мумкин, деб хабар беради AS.
Манба берган хабарга кўра, Каталония клуби бош мураббийи Хави ҳужумчи билан суҳбатлашиб, унга режалари ҳақида маълумот берган. Мураббийнинг фикрича, у биринчи навбатда Роберт Левандовски, Пьер-Эмерик Обамеянг, Рафинья ва Усмон Дембелега таянади. Шундай қилиб, нидерландияликнинг майдонга тушиш имконияти жуда кам бўлади.
Олдинроқ Депай "Тоттенхэм"га ўтишдан бош тортгани ҳақида хабарлар тарқалган эди.
28 ёшли Депай ўтган мавсумда "Барселона" сафида барча турнирларда 37та ўйинда майдонга тушиб, 13та гол урди ва 2та голга ассистентлик қилди. Унинг клуб билан шартномаси 2023 йилнинг ёзига қадар мўлжалланган.
