"Манчестер Юнайтед" бош мураббийи Эрик тен Хаг ҳужумчи Криштиану Роналдуни клубда қолишга ишонтирмоқчи, бироқ футболчи ҳалигача кетишга қарор қилган, деб хабар беради Marca.
Манба берган хабарга кўра, Роналду бугун, 26 июль куни ўз атрофидаги зиддиятли вазиятлардан қочиш мақсадида мавсумолди машғулотларини ўтказиш учун жамоага қўшилади, бироқ португалиялик футболчи ўз режаларини ўзгартирмаган ва ҳалигача клубни тарк этишни талаб қилмоқда.
Тен Хаг юлдуз ҳужумчини "Манчестер Юнайтед" билан шартномасини узайтиришга ва уни клубнинг янги лойиҳасига қизиқтиришга кўндирмоқчи. Португалиялик футболчи учун ҳал қилувчи омил - УЕФА Чемпионлар лигасида иштирок этиш факти, шунинг учун у ушбу мавсумда бу мусобақада иштирок этадиган клубга ўтишни режалаштирмоқда.
Эслатиб ўтамиз, аввалроқ Роналду "Атлетико Мадрид"га ўтиши мумкинлиги ҳақида хабарлар тарқалган эди.
