Лондоннинг "Челси" клуби Маркос Алонсо ва Сезар Аспиликуэтанинг "Барселона"га ўтишига тўсқинлик қилмоқчи, дея хабар бермоқда AS нашри.
Манбанинг хабарига кўра, "аристократлар" "Лидс" билан Рафиньяни қўлга киритиш борасида келишувга эришган, аммо "Барселона" сўнгги дақиқада трансферга аралашган ва футболчи шу заҳоти фикрини ўзгартириб, каталонияликлар сафига ўтган. Худди шунга ўхшаш вазият Жюль Кунде билан ҳам содир бўлди. "Кўклар" Усмон Дембеле билан боғлиқ вазият билан қизиқди, аммо якунда Стерлингни олишга қарор қилди ва франциялик футболчи "Барселона" билан шартномасини узайтирди. Бу ҳолатларнинг барчаси "Челси" директорлар кенгашини "Барселона"га икки ҳимоячини юбормасликка мажбур қилади.
Аспиликуэта ва Алонсо "Барселона"нинг трансфер мақсадлари. “Кўк-анорранглилар” футболчиларнинг шартнома шартларидан келиб чиқиб, икки футболчини арзонлаштирилган нархда сотиб олмоқчи эди. Иккаласининг ҳам “Челси” билан шартномаси 2023 йилнинг ёзида якунига етади.