"Рома" ҳужумчиси Элдор Шомуродов жамоани тарк этишга яқин турибди. Боиси, римликлар уни "Тоттенхэм"га қарши бўладиган ўртоқлик ўйини учун Исроилга олиб кетишмади. Ўзбекистонлик футболчи айни пайтда келажаги билан боғлиқ масалани ҳал этиш учун Римда қолди.

Romagiallorossaa.it сайти тарқатган хабарга кўра, Шомуродовга А сериянинг 5та клуби томонидан қизиқишлар бор. Энг асосий даъвогар — "Торино". Бундан ташқари, "Болонья", "Сампдория", "Удинезе" ва "Сассуоло" клублари ҳам Элдорга қизиқиш билдиришган. Ҳамюртимизнинг кейинги клуби яқин орада аниқ бўлади. Унинг янги жамоаси Шомуродовни кейинчалик сотиб олиш шарти билан ижарага олиши кутилмоқда.

Агар Шомуродов ва "Рома"нинг яна бир форварди Стефан эл-Шаравий жамоани тарк этишса, Моуриньо уларнинг ўрнига Андреа Белотти ("Торино") ва Луис Муриель ("Аталанта")ни олиб келишга ҳаракат қилади.