"В" гуруҳининг иккинчи турида ҳам ғалаба қозонган Германия терма жамоаси чорак финал томон яна бир муҳим қадам ташлади.
Мусобақанинг асосий фаворитларидан бири бу сафар бошқа бир фаворит, Нидерландлар терма жамоасини мағлуб эта олди.
Илк турда кутилмаганда Даниядан мағлуб бўлиб, ўз имкониятларини пасайтириб юборган "учар ҳолланд"лар иккинчи ўйинни ҳам мағлуб бўлиб тарк этмоқдалар.
Шундай бўлса-да, ҳолландларда ҳали имконият бор. Назарий жиҳатдан улар ҳали ўз имкониятларини йўқотганларича йўқ.
Ўйинга тўхталадиган бўлсак, Нидерландлар терма жамоаси кутилганидек ўйинни ҳужумкор руҳда бошлади. Аммо немислар бўлим ўрталарида рақибларининг бўш нуқталарини топиб олишди. Иккита чиройли ҳужум ва чиройли тўп оширишлардан сўнг, Марио Гомес бир-биридан чиройли голлар киритиб жамоасини 2:0 ҳисобида олдинга олиб чиқди.
Иккинчи бўлимда ҳолландлар ҳар қанча ҳужумга зўр беришмасин, уларнинг кучи фақат битта жавоб тўпи киритишга етди - 2:1. Германия иккинчи учрашувда ҳам ғалаба қозонган илк терма жамоага айланди.
НИДЕРЛАНДЛАР – ГЕРМАНИЯ 1:2 (0:2)
Голлар: Робин ван Перси, 73 - Гомес, 24, 38
Нидерландия: Стекеленбург - ван дер Виль, Ҳейтинга, Матейсен, Виллемс - ван Боммель (ван дер Ваарт, 46), Н.де Йонг – Роббен (Куйт, 83), Снейдер, Афеллай (Ҳунтелаар, 46) - ван Перси
Германия: Нойер - Боатенг, Ҳуммельс, Бадштубер, Лам - Хедира, Швайнштайгер – Мюллер (Л.Бендер, 90+2), Ўзил (Кроос, 81), Подольски – Гомес (Клозе, 72)
