Кристиан Бентеке “Кристал Пэлас”ни тарк этди. У Американинг "Ди Си Юнайтед" жамоаси футболчисига айланди, деб хабар беради инглиз клуби сайти.
Бельгиялик футболчи клуб била5 2,5 йиллик шартнома имзолади. Америкаликлар шартномани яна бир мавсумга узайтириш имкониятига эга бўлади.
Бентеке ўтган мавсумда "Кристал Пэлас"нинг 31та ўйинида майдонга тушиб, 4та гол ва 1та голли узатмани амалга оширган. Мавсумнинг иккинчи ярмида футболчи асосий таркибдаги ўрнини йўқотди ва тез-тез захирада майдонга туша бошлади.
Transfermarkt.com томонидан Бентеке 6 миллион еврога баҳоланган.
Аввалроқ, 31 ёшли бельгиялик ўз мамлакати терма жамоаси таркибида 2022 йилги жаҳон чемпионати олдидан кўпроқ ўйин амалиётига эга бўлишни хоҳлаётгани ҳақида хабарлар тарқалган эди.
Эслатиб ўтамиз, "Ди Си Юнайтед" бош мураббийи "МЮ" ва Англия терма жамоаси собиқ ҳужумчиси Уэйн Руни ҳисобланади.