Нидерландларнинг собиқ дарвозабони Ван дер Саар "Аякс" клубининг амалдаги бош мураббийи Франк де Бурниннг терма жамоани бошқариши ҳақидаги фикрларга ўз муносабатини билдириб ўтди.

 
"Ҳозир бунинг мавриди эмас, лекин ўйлашимча 6-7 йилдан кейин терма жамоани бошқариш де Бур учун яхши вақт бўлса керак" дейди Ван дер Сар goal.com сайтига берган интервьюсида. "Фикримча у энг аввало хориж чемпионатларидан бирорта каттароқ жамоани бошқариши керак, шундан сўнг терма жамоада ишласа бўлади."

Шунингдек Ван дер Саар ўз дўсти де Бурнинг "Аякс" клубидаги фаолият ҳақида ҳам ўз фикрини билдириб ўтди. 

"Франк де Бур менинг энг яқин дўстим. У клубда ўз ишини аъло даражада олиб бормоқда. Қаторасига икки марта "Аякс" билан мамлакат чемпионлигини қўлга киритганининг ўзиёқ унинг яхши иш олиб бораётганидан далолат. Умид қиламанки, улар Чемпионлар лигасида ҳам шундай ўйин намойиш этишади. Мен уларнинг мана шу мусобақада ҳам ажойиб иштирок этишларини ҳоҳлардим." 

Ўзининг кейинги фаолияти ҳақида берилган саволга эса қуйидагича жавоб берди: "Ҳозирча ҳеч нарса дея олмайман. Албатта бу таклифларга боғлиқ. Ўзим ўйнаган жамоаларда яхши вақтларни ўтказдим. Бироқ ўз ватанимга қайтдим. Мен учун "Аякс" варианти яхши бўларди, бироқ ҳозир бу ҳақда ўйлаётганим йўқ.