«Рома» ва «Болонья» клублари вакиллари ҳужумчи Элдор Шомуродовнинг трансфери юзасидан яна музокараларга қайтишди.

Бундан бир ҳафта аввал томонлар ушбу масалада музокара ўтказишган, аммо бир тўхтамга кела олишмаган эди. Болоньяликлар 27 ёшли футболчини бир йилга ижарага олиб, келаси йилда унинг трансферини, маълум шартлар бажарилган тақдирда, 10 миллион еврога сотиб олишни таклиф этишди (аввалги таклифга 1 миллион евро қўшилди). "Бўрилар" эса мажбурий трансфер учун 14 миллион евро талаб қилишда давом этишмоқда.

"Рома" бош мураббийи Жозе Моуриньо кеча ҳужумчи Шомуродовни асосий таркибга тортадиган футболчи эмас, дея атади. Шу боис, ўзбекистонлик футболчида Римни тарк этишдан бошқа вариант қолмади. Боз устига, римликлар ҳужумчилардан бирини сотиш орқали "Торино"нинг собиқ форварди Андреа Белотти учун жойни бўшатишлари керак.

Томонлар ўртасидаги бу галги музокара қандай якунланиши ҳозирча аниқ эмас. Катта эҳтимол билан "Рома" директори Тиаго Пинто "Болонья" таклиф қилаётган нархга кўнади.