"Труа" ўзининг расмий сайтида "Севилья" ҳужумчиси Рони Лопеш билан шартнома имзолаганини эълон қилди. 26 ёшли португалиялик футболчи француз клубида бир мавсумни ижара асосида ўтказади.

Шартномада футболчини кейинги сотиб олиш кўзда тутилмаган.

Ҳужумчи 2019 йилда "Монако"дан "Севилья"га ўтганди. Унинг испан клуби билан амалдаги шартномаси икки йилдан кейин якунига етади.

Лопеш ўтган мавсумни "Олимпиакос"да ижара асосида ўтказди. Ҳужумчи барча мусобақаларда 27 та ўйин ўтказиб, 4 та гол урди ва 4 та голли узатмани амалга оширди. Transfermarkt портали футболчини 4 миллион еврога баҳоламоқда.