Одатда футболчилар ўзлари билан ўйнайдиган жамоа ёки рақиб клуб футболчилари ҳақида олдиндан маълумот олишга интилишади. Аммо маълум бўлишича, Каземиро фақат бу билангина чекланиб қолмаган.

Бразилиялик журналист Маркус Алвес хабарига кўра, "Реал"нинг собиқ ярим ҳимоячиси ҳар бир ўйин олдидан учрашувда ишлайдиган ҳакамлар ҳақида маълумотлар тўплайди.

Каземиро ҳакамнинг обрўси, у билан қандай мулоқот қилиш, туғилган жойи, бошқа иши борми ёки йўқлиги ва ўйинни бошқариш услуби каби маълумотларни ўрганади.

Каземиро доим қўпол ўйинчи сифатида танилган. Шунга қарамай, у "Реал Мадрид" билан 336 та ўйинда тўғридан-тўғри қизил карточка олмаган. Бразилиялик футболчи 90 марта огоҳлантириш олди ва фақат икки марта иккинчи сариқ карточка орқали майдондан четлатилган.