Италия терма жамоаси яримҳимоячиси Андреа Пирло Англия устидан қозонилган ғалабадан сўнг (4:2, пенальтилар сер.) нима учун пенальтини бундай усулда тепишга қарор қилганини айтди.

- Тўпни тепмоқчи бўлганимда дарвозабон ғалати қилиқлар қилаётганини илғадим, - дейди Пирло. - Шунинг учун у навбатдаги марта қимирлашини пойладим ва тепдим. Менинг зарбамдан кейин Англиянинг асабийлашишини истадим. Шундай бўлиб чиқди - Эшли Янг мендан кейин тепди ва тўсинни пойлади.

- Ўйиннинг ўзи ҳақида сизнинг фикрингиз?

- Англия ҳеч қандай вазият яратмади, шунчаки 0:0 ҳисобини ушлаб қолиб, пенальтилар сериясигача боришни истади. Биз ўйинни назорат қилдик ва охирги дақиқаларгача ютишга ҳаракат қилдик. Улар бутун гуруҳ босқичини шундай ўтказдилар, уларнинг ҳимоявий усули биз учун янгилик эмас эди. Ҳатто биз уларни 120 дақиқа давомида сиқувга ололмаганимиз, шунча энергия сарфлаб гол ура олмаганимиз бироз уятли кўринмоқда. Бахтимизга пенальтилар сериясида ғалабага лойиқ бўлган жамоа ютди.

- Марио Балотеллининг ўйинига қандай баҳо берасиз?

- У меҳнат қилди ва қўлидан келганича жамоага ёрдам берди.Тўғри, охирида кўп вазиятларни йўқ қилди. Аммо унинг учун ҳаммаси олдинда. У ўйнайди.