Сўнгги пайтларда блогимга ёзишга вақт топа олмадим. Узр. Буни тўғри тушунишларингизни сўрардим. Яқинда оила қурдим, тўй олди ва ундан кейинги маросимлар, шунингдек “Бунёдкор”нинг охирги пайтлардаги муҳим учрашувлари сабаб блогимга маълум вақт эътибор қарата олмадим.

Энди яна Сиз азизлар билан биргаман. Ўй фикрларим, мулоҳазаларим билан мухлисларимни хурсанд қилишда давом этаман.

Кўпчилик ички чемпионатимизда рақобат ортиб бораётгани ҳақида гапиряпти. Шахсан мен соғлом рақобатни деярли кўрмаяпман. “Бунёдкор” ўз ўйинларида уч очкодан йиғаверса, якунда ўз мақсадига эришади. Ана шунда рақибларимиз қайд этадиган натижа биз учун ҳеч қандай аҳамиятга эга бўлмайди. Уларнинг ўйинларига боғланиб қолмаймиз.

Осиё Чемпионлар лигасининг кузги босқич ўйинларига йўлланма олдик. Жуда оғир бўлган йўлни босиб ўтдик. Бундан кўпчилик жудаям хурсанд. Учта фронта ўйнаш футболчидан яхшигина куч талаб қилади. Агар учала мусобақада ҳам ютаверсак ва бунга жавобан мухлисларимиз бизни қўллаб-қувватлаб туришса, у ҳолда умуман чарчамаймиз. Аксинча, буни ёқимли толиқиш дейиш мумкин.

Ҳозирги пайтда аксарият мухлислар “Бунёдкор” – “Пахтакор” қарама-қаршилигини кутишмоқда. Тошкент дербисига яхшироқ эътибор қаратамиз. Бу чемпионатнинг оддий бир учрашуви эмас. Бу ўйинда – клуб анъаналари, совринлари, керак бўлса жамоа орияти ва шу каби жиҳатлар ўртага тикилади! Бундай нуфузи баланд ўйинларда майдонга тушиш футболчи учун жудаям бошқача. Одатда бир шахарнинг икки жамоаси рўбарў келганда, жамоаларнинг турнир жадвалидаги ўрни, ҳолати, таркиби буткул унутилади. Фақатгина жамоа номлари ўйнайди. Масъулиятли ўйинда мухлисларимизни хурсанд этишга ҳаракат қиламиз.