Жорий йилнинг 23-24 июнь кунлари Қарши шаҳрида Ўзбек футболининг 100 йиллик юбилейи ҳамда Ўзбекистон Республикаси мустақиллигининг 21 йиллиги муносабати билан вилоятдаги спорт турлари бўйича федерациялар ўртасида байрамона мини футбол шоу ўтказилди.

Мазкур мини-футбол шоунинг очилиш ва ёпилиш маросимлари тантанали равишда ўтказилиб, вилоятдаги ёш ижодкорлар ва бадиий ҳаваскорлик дасталари ижросидаги чиқишлар тадбирга ўзгача шукуҳ бағишлади.

Мусобақада вилоят маданият ва спорт ишлари бошқармаси, “Камолот” ЁИХ вилоят кенгаши ҳамда спорт турлари буйича федерация ходимларидан иборат 22 та жамоа иштирок этди.

Ўтказилган мини-футбол мусобақасининг финал босқичида вилоят футбол федерацияси жамоаси “Енгил атлетика” федерацияси жамоаси устидан 3-2 ҳисобида ғалаба қозониб, мусобақа ғолиби деб топилди. Шунингдек, 2-ўринга “Енгил атлетика” федерацияси жамоаси, 3-ўринга “Жеет кунедо” федерацияси жамоаси, 4-ўринга эса вилоят маданият ва спорт ишлари бошқармаси жамоаси лойиқ деб топилди. 

Мусобака ғолиблари кубок ва ҳамкор ташкилотларнинг эсдалик совғалари билан тақдирландилар. 

Ушбу мини-футбол мусобақаси вилоятдаги спорт турлари бўйича федерациялар ўртасида гиёҳвандлик, диний экстремизм ва терроризмга қарши кураш, воҳада футбол турини янада ривожлантириш, федерациялар ўртасида дўстона иш олиб боришни жадаллаштириш ҳамда уларни жисмоний соғломлаштиришга хизмат қилиши шубҳасиз.