Про лига 15-турининг қолдирилган "Хоразм" - "Бухоро" учрашувидан (1:2) сўнг меҳмонлар бош мураббийи Ҳаким Фузайлов ўз фикрлари билан ўртоқлашди.
"Мавсумнинг якуний қисмига яқинлашиб қолдик, яна бир турдан сўнг, плей-офф босқичи бошланади. Бугунги ўйинга қисқача тўхталадиган бўлсам, ғалаба ҳар иккала жамоага сув ва ҳаводек зарур эди. Биз бу ерга, фақат ғалаба қозониш мақсадида ташриф буюрган эдик. Қийин ўйин бўлишини олдиндан билар эдик. "Хоразм" жамоаси сунъий майдонда тўп суради, бу футболчиларга бир қатор қийинчиликлар туғдириши табиий ҳол ва биз шунга монан тайёргарлик олиб бордик. Майдонда тенг кураш кечди, бироқ бугун омад биз томонда бўлди. Қийинчилик билан бўлсада, 3 очкога эга чиқдик. Йигитларга катта раҳмат борларини бериб курашганлари учун", - деди Фузайлов.