Pro liga 15-turining qoldirilgan "Xorazm" - "Buxoro" uchrashuvidan (1:2) so‘ng mehmonlar bosh murabbiyi Hakim Fuzaylov o‘z fikrlari bilan o‘rtoqlashdi.
"Mavsumning yakuniy qismiga yaqinlashib qoldik, yana bir turdan so‘ng, pley-off bosqichi boshlanadi. Bugungi o‘yinga qisqacha to‘xtaladigan bo‘lsam, g‘alaba har ikkala jamoaga suv va havodek zarur edi. Biz bu yerga, faqat g‘alaba qozonish maqsadida tashrif buyurgan edik. Qiyin o‘yin bo‘lishini oldindan bilar edik. "Xorazm" jamoasi sun’iy maydonda to‘p suradi, bu futbolchilarga bir qator qiyinchiliklar tug‘dirishi tabiiy hol va biz shunga monan tayyorgarlik olib bordik. Maydonda teng kurash kechdi, biroq bugun omad biz tomonda bo‘ldi. Qiyinchilik bilan bo‘lsada, 3 ochkoga ega chiqdik. Yigitlarga katta rahmat borlarini berib kurashganlari uchun", - dedi Fuzaylov.
